ab vo karam kareiN ya sitam

September 12th, 2011

Lovely song sung by Mohd. Rafi, penned by Sahir from the movie Marine Drive (1955)

ab vo karam kareiN k sitam maiN nashe meiN houN
mujhko na koi hosh na Gham maiN nashe meiN houN
seene se bojh unke GhamoN kaa utaar ke
aayaa houN aaj apni javaani ko haar ke
kahate haiN Dagamagaate qadam maiN nashe meiN houN
wo bewafaa haiN ab bhii ye dil maantaa nahiIN
kambaKht naa-samajh hai unheiN jaantaa nahiiN
maiN aaj toR douNgaa bharam, maiN nashe meiN houN
fursat nahiiN hai rone rulaane ke vaaste
aaye na unki yaad sataane ke vaaste
is waqt dil kaa dard hai kam, maiN nashe meiN houN

Share/Bookmark

dekha hai zindagi ko kuchh itnaa qareeb se

July 18th, 2011

dekhaa hai zindagii ko kuchh itnaa qareeb se
chehre tamaam lagne lage haiN ajeeb se

is rengati hayaat kaa kab tak uThaayeiN baar
beemaar ab ulajhne lage haiN tabeeb se

har gaam  par hai majamaa-e-ushshaaq muntazir
maqtal ki raah milti hai kuu-e-habeeb se

is tarah zindagi ne diyaa hai hamaaraa saath
jaise koi nibaah rahaa ho raqeeb se

ai rooh-e-asar jaag, kahaaN so rahi hai tu
aawaaz de rahe haiN payambar saleeb se

Glossary

rengati = crawling
hayaat = life
baar = weight
tabeeb = doctor/healer
gaam = step
majmaa = crowd
ushshaaq = lovers (Plural of aashiq)
muntazir = awaiting
maqtal = place of execution
kuu-e-habeeb = lover’s street
raqeeb = rival
payambar = prophets
saleeb = cross

 


ye desh hai veer javaanoN ka

August 15th, 2010

Happy Independence day!

From the movie Naya Daur, Here’s a beautiful song by Sahir to celebrate this day:

ye desh hai veer javaanoN ka albeloN ka mastaanoN ka
is desh ka yaaroN, is desh kaa yaaroN kyaa kahnaa
ye desh hai duniyaa ka gehnaa

yahaaN chauRii chhaatii veeroN ki
yahaaN bholi shakleiN heeroN ki
yahaaN gaate haiN raaNjhe, yahaaN gaate haiN raaNjhe masti meiN
masti meiN jhuumeiN bastii meiN

peRoN meiN bahaareN jhuuloN ki
raahoN meiN kataareiN phooloN ki
yahaaN haNstaa hai saawan, yahaaN haNstaa hai saawan baaloN meiN
khilatii hai kaliyaaN gaaloN meiN

kahiiN daNgal shoKh javaanoN ke
kahiiN kartab teer kamaanoN ke
yahaan nit nit mele! yahaaN nit nit mele sajte haiN
nit Dhol aur taashe bajte haiN

dilbar ke liye dildaar haiN ham
dushman ke liye talvaar haiN ham
maidaaN meiN agar ham! maidaaN meiN agar ham Dat jaayeiN
mushkil hai ki peechhe haT jaayeiN!


tu hindu banega na musalmaan banega

August 13th, 2010

A lovely song, beautifully sung by Rafi from the movie Dhool ka Phool (1959).  Fitting in with my nationalistic posts in the last week or so, this is a must for our secular India.

tu hindu banega na musalmaan banega
insaan ki aulaad hai insaan banega

qudrat ne to banaai thi ek hi duniyaa
hamne use hindu aur musalmaan banaayaa
tuu sabke liye aman ka paiGhaam banega
insaan ki aulaad hai, insaan banega

ye deen ye eemaan dharam bechane vaale
dhan-daulat  ke bhookhe vatan bechane vaale
tu inake liye maut ka ailaan banega
insaan ki aulaad hai insaan banega

[


Next Page »


Follow sahirludhianvi on Twitter